Паслугі


Абдамінапластыка


Сучасная пластычная хірургія здольная даць рады шмат з якімі заганамі, у тым ліку збавіць пацыента ад асіметрыі пярэдняй чэраўнай сценкі. Парушэнні прапорцыяў пярэдняй чэраўнай сценкі і тулава паўстаюць найчасцей у выніку перарасцягу цягліцаў (а так сама і іншых структураў) і павелічэння таўшчыні скурна-тлушчавай складкі жывата. У такім выпадку неабходна звярнуцца да пластычнага хірурга па аперацыю — абдамінапластыку.

Абдамінапластыка мае даўнюю гісторыю, належыць да складаных, але дасюль практыкаваных пластычных аперацый. Папулярнасць яе штогод толькі расце.

У якіх выпадках робяць абдамінапластыку?

  1. Калі немажліва выдаліць лішак скуры і падскурнай абалоніны пярэдняй чэраўнай сценкі альтэрнатыўнымі шляхамі, гэткімі як дыета, комплекс фізічных практыкаванняў або ліпасакцыя.
  2. Калі немагчыма эфектыўна выканаць ліпасакцыю з-за значнага лішку скуры.
  3. Пры наяўнасці выразных расцягаў (бледых стрый або «шнараў цяжарнасці»), што з’яўляюцца праз моцны перарасцяг скуры.
  4. Калі ёсць скурна-тлушчавы фартух і апушчэнне (птоз) пярэдняй чэраўнай сценкі.
  5. Калі маецца заўважнае вокам разыходжанне простых цягліцаў жывата або ёсць кіла.
  6. Пры наяўнасці грубых пааперацыйных шнараў у ніжняй частцы жывата.

Спалучаць абдамінапластыку з паражніннымі аперацыямі не варта.

Проціпадставы да абдамінапластыкі

  1. Сэрцавая і лёгачная няздатнасць.
  2. Цукровы дыябет у стадыі дэкампенсацыі.
  3. Затлусценне.
  4. Пааперацыйныя шнары, якія месцяцца вышэй за ўзровень пупа.
  5. Запланаваная цягам году цяжарнасць.

Абдамінапластыка не ратуе ад затлусцення і не прызначаецца для памяншэння вагі. Пры наяўнасці лішку вагі цела, выкананне аперацыі можа быць бессэнсоўным, бо наступнае зніжэнне вагі наноў пацягне за сабой дэфармацыю жывата. Такім чынам, раюць напачатку схуднець і толькі пасля думаць пра абдамінапластыку.

Сутнасць аперацыі абдамінапластыкі

У самым нізе жывата, акурат над лабком, хірург робіць разрэз скуры. Менавіта праз яго будзе «прыўздымацца», мабілізоўвацца абвіслая скура з жывата разам з падскурнай тлушчавай абалонінай.

Атрыманы лішак скуры разам з падскурнай абалонінай выдаляецца. Пуп захоўваецца, яго выкройваюць і фіксуюць на новым месцы. Перасунуць верхнія аддзелы чэрава, не закранаючы пупа, немагчыма. Цягам аперацыі выконваецца таксама пластыка цягліцаў пярэдняй чэраўнай сценкі. Гэта дазволіць змяніць абрыс жывата, падкрэсліць постаць.

Наступствамі аперацыі можна лічыць шнар над лабком даўжынёю да 30–40 см і амаль нябачны шнар вакол пупа.

Што такое мініабдамінапластыка?

У пэўных выпадках можна абмежавацца мініабдамінапластыкай. Гэта аперацыя высячэння лішкаў скуры пярэдняй чэраўнай сценкі без перасоўвання пупа. Яе зазвычай спалучаюць з ліпасакцыяй. Пасля мініабдамінапластыкі застаецца адзін шнар над лабком, даўжынёю да 30–40 см (ледзь заўважны ўздоўж лініі бікіні).

Рэкамендацыі ў пааперацыйны перыяд і наступствы аперацыі

  • На працягу 2–3 месяцаў неабходна насіць адмысловы кампрэсійны пас.
  • Шнары на пярэдняй чэраўнай сценцы застануцца на ўсё жыццё, хоць з цягам часу зробяцца меней заўважнымі.
  • Часовая страта чуллівасці некаторых абсягаў паверхні чэраўнай сценкі. У адзінкавых выпадках чуллівасць знікае назаўжды.
  • Цягам месяцу або двух захоўваецца набракласць тканак жывата і кровазліцці, што выяўляюцца ў выглядзе сінякоў.
  • У пааперацыйны перыяд можа назірацца збіранне тканкавай вадкасці альбо крыві пад скурай у абсягу чэрава. Можа спатрэбіцца выцягванне вадкасці пры дапамозе шпрыца.
  • Калі даўжыня падскурнай тлушчавай абалоніны перасягае норму, маніпуляцыі ў верхніх аддзелах жывата з перамяшчэннем скуры і накладаннем швоў могуць прывесці да ўтварэння так званага валіка (вышэй за лінію швоў). Каб зліквідаваць гэтую хібу, можа спатрэбіцца яшчэ адна аперацыя (ліпасакцыя).

У медыцынскім цэнтры «Конфідэнс» робяць складаныя хірургічныя аперацыі толькі пасля ўважлівага даследвання і кансультацыі.

mee

Наш медыцынскі цэнтр называецца «Конфиденс», што азначае - «давер». Менавіта «давер» з'яўляецца нашым крэда. І нашы пастаянныя кліенты ўжо шмат гадоў давяраюць нам. Медыцынскі цэнтр «Конфиденс» - мы робім усё, каб апраўдаць ваш давер!